محمدين وحسنين وهريدى بيتكلموا فى السياسة ؟؟؟

ثقافة الاختلاف

يمكن بعد فترة غياب اراها ليست بالقصيرة فى استخدام قلمى الخاص فى طرح احد الموضوعات للنقاش رأيت موضوع يستحق ان اقطع فترة البيات الشتوى التى انتابتنى فى طرح نقاشات للاعضاء الاعزاء

ثقافة الاختلاف

لن اعتمد فى هذا الموضوع على نقل معلومات او اقتباس كلمات منمقة فصيحة او تعريفات مملة لهذه العبارة انما سأعتمد على آرائى الخاصة فى طرح الموضوع المهم ان يلقى استجابة من الاعضاء ( يارب ) اوكى

ثقافة الاختلاف

اذا دخلنا فى صلب الموضوع سنجد داخل المنتدى بصفة خاصة نفتقر لثقافة الاختلاف وتقبل الرأى الآخر من عدة ابواب الباب الرئيسى فيها هو عدم تقبل الشخص فكرة احتمال ان يكون على خطأ
الفكرة اننى ممكن ان اخطئ ( شئ طبيعى ) عادى يعنى زى كل الناس
ايوة فيها ايه

محمد بيغلط ومحمدين بيغلط ومحمدات برضه بتغلط

فكرة اعتراف الشخص انه ممكن فى شئ ما او نقاش ما يمكن ان يكون على خطأ ( ولو بنسبة بسيطة يعنى ) هى الحل السحرى لتقبل ثقافة الاختلاف يعنى لما اعرف اننى ممكن اغلط حقبل فكرة انى من حق الآخرين يختلفوا معايا

ولا إيه ؟؟؟

ثقافة الاختلاف

الشئ الثانى عدم شخصنة الامور بمعنى انى لما اقول لاحمد زويل العالم المصرى انى بختلف معاه فى ان تطبيق اكتشافه للفيمتو ثانية فى مجال العلاج بالليزر وان فيه خطورة كبيرة على الخلايا الليمفاوية العقذية ( ايه الكلام المجعلص ده ) يبقى عادى
لان انا مش بقول ان احمد زويل ده حمار ( انا آسف ) لأ ابسليوتلى على رأى اللمبى
انا بختلف فى حاجة علمية مجعلصة انا مش فاهمها اصلا لكنه مثال كويس .... صح ؟؟؟

المفروض لما واحد ينتقد آرائى انا مزعلش انا ليا كل الحق فى الدفاع عن رأيى اللى بشوفى صح وهو كمان له كل الحق انه ينتقد آرائى بس محدش له الحق انه ينتقد شخصى

يعنى انا لما اهاجم افكار بعض الاخوة او معتقداتهم مش معنى كده انى بهاجمهم هما شخصياً بالعكس ممكن اكون بحترم جداً الشخص اللى بختلف معاه لكن ده ميمنعش انى اختلف معاه بل واهاجم افكاره دى
وهو كمان ممكن يهاجم افكارى وينتقد كلامى دون ان يؤثر ذلك على الاحترام المتبادل
لكن عند انتقاد افكار شخص ما او طريقته فى النقاش تتهم انك بتؤثر على العلاقة الشخصية التى لاتتعدى حدود الاحترام المتبادل

انا بصراحة بيعجبنى جداً فى الملاعب الاوروبية ان المدير الفنى لكل فريق بعد الماتش لازم يقوم يسلم على المدير الفنى بتاع الفريق التانى قمة معنى كلمة ثقافة الاختلاف
احنا بنتنافس اه لكن مش بنعادى بعض

كمثال

انا بقول ان جمال عبدالناصر اهم واحسن رئيس فى مصر
فيها حاجة دى

عادى

يقوم واحد صاحبى مثقف ومعرفوش يقولى
لأ انت تحليلك لفترة حكم عبدالناصر فيها ازدواجية معيار طبقى برجمى وكل الكلام العبيط بتاع المثقفين ده ؟؟

طبعاً انا لازم اعمل مثقف ومبينش انى مش فاهم الكلام الكبير ده
ونقعد نتناقش
وبعد المناقشة احنا حبايب

لكن تخيلوا بقى لو انا قلت مثلا لتامر اخوى ماانتوا عارفينه

ان عبدالناصر احسن رئيس فى مصر

يقوم ابواحمد يقولى ايه

اسكت ياد انت حمار ومبتفهمش اي حاجة واوعى تفتح بوزك تانى عشان انا مصدع وعايز انام

اقوم اقوله ايه

انا حمار ده انت ؟؟؟؟؟؟؟؟؟ وانا غلطان اللى جاى اتكلم معاك

اللى عايز اوصله ان طالما ان المناقشة فيها احترام متبادل + النقد يكون فى آراء فقط وليس انتقاد اشخاص

يبقى اتقبل الكلام وعادى وميكونش فيه اى شئ

لكن الغريب فعلا

انك لو عارضت اى واحد يبقى كأنك اعلنت الحرب عليه
يقوم يلم كل جيوشه ويوجه لك انذار بإطلاق النار

طيب ليه يااخى هو يااما ابقى معاك وامشى فى الزفة يإما ابقى عدوك اللدود ؟؟؟
لازم يبقى فيه منطقة وسط ( محايدة ) نلتقى فيها

الشئ الاخير اللى عاوز اتكلم فيه عشان عاوز اروح انام شوية قبل مااقوم انام

ان طريقة الاختلاف بتحدد بشكل كبير المناقشة حتعدى على خير ولا الحرب حتقوم

يعنى مثلا

محمدين وحسنين وهريدى قاعدين بيشربوا جوزة فى الزرع

محمدين قال
الحزب الوطنى مية مية يارجالة

قام الواد حسنين قاله
انت ضلالى ومعندكش مبدأ وماشى تبع الكوسة والخ من الكلام الحلو ده اللى على الحزب الوطنى

لكن الواد هريدى قال ايه
بصراحة يامحمدين انا بحترم رأيك وانت لك وجهة نظر لكن انا بختلف معاك فى عدة نقاط فى الايدولوجية التى ينتهجها الحزب الوطنى فى حكم مصر طوال الفترة الماضية ( متستغربوش اصل الواد هريدى طالع من 6 ابتدائى مثقف يعنى ) ؟؟

تفتكروا حيبقى ايه شعور محمدين تجاه حسنين ؟؟؟
وتفتكروا حيبقى ايه شعور محمدين تجاه هريدى ؟؟؟

بصراحة الموضوع اكبر من كده بس انا تعبت من الكتابة ومش عارف دى اول مرة اكتب بالطريقة دى ؟؟؟
ابقوا قولولى ايه رأيكم فى الكلام الكتير ده

الله عليييييك يابوعبدالله جااااامد في مواضيعك كالعاده ومتالق في طرحها
المهم ياريس بالنسبه لموضوعك المطروح ثقافة الاختلاف اعتقد ان هذه الثقافه تايهه او موجوده بس بقله بين طبقه معينه من الناس او اناس يفهمون ما هي ثقافة الاختلاف يابوعبدالله لا يخفي عليك انني من الناس الذين يقولون رايهم بصراحه في اي موضوع فالبتالي في وقت من الاوقات واجهت نقد بسبب انتقادي للمواضيع وقول راي بصراحه وايضا بعض من الاشخاص بسبب ان اختلفت معهم في موضوعهم هاجموا شخصي في النهايه اردت ان اقول نسال الله من الجميع ان يتعلموا ثقافة الاختلاف وانني اذا اردت اخالف شخص ما في موضوع ما لا اهاجمه شخصيا بل انتقد افكاره برويه وهدوء

تسلم ومشكور على المرور الكريم يااخ محمد

وانا بعتبر ان المشكلة الرئيسية هى الواحد لما ياخذ الموضوع بشكل شخصى وبيعتبرها اهانة وفعلا فى البعض بيعتبر انك لما تحتلف معاه انك تعديت حدودك معاه

مشكور يامحمد على المرور الكريم

أخى الكريم الأختلاف فى الرأى لأيفسد للود قضية انا ممكن

أختلف معاك فى موضوع وانت ممكن تختلف معايا فى موضوع فلابد

على الشخص الأخر يقنع التانى بالادلة والبراهين على انه

خاطئ فى هذا الموضوع بس يكون من غير تجريح اونقصان من

الشخص الأخر فانا احترم راية واعترف بانى خاطئ

ghfgjh

كل الشكر للاخ الكريم ابوسما على مروره الكريم
ورده الجميل
واحب اضيف اخى الكريم ان الذى كتبته هو ماندعو اليه ان نتناقش بعيداً عن شخصنة الامور انا اختلف معاك فى آرائك شئ عادى لكن عمرى مااختلف مع واحد لشخصه
ياريت نسيب اشخاصنا خارج اطار النقاش

شكراً جزيلاً

محمدين وحسنين وهريدى بيتكلموا فى السياسة ؟؟؟ SDY46972

اية الحلاوة دى يا أبو عبداللة
لا بجد طريقتك حلوة وممتازة وانا فى رآى ليك مستقبل كبير
فى المستقبل وأحلى حاجة البساطة فى الكلمات
أما بالنسبة على موضوع الاختلاف فى الرؤى والحوار
أنا عن نفسى شايف كلامك أكيد صح
بنتعامل كاالاعداءمفيش لغة الحوار
اّذا فية واحد رأيو مختلف عن التانى مفيش حد بيحاول
يبين وجة نظروويقول لا أنتا غلطان فى كدا والمفروض تكون كدا
منعدمة عندنا لغة الحوار
بالذات عندنا هنا فى المنتدى وأكيد دى حاجة مش حلوة
بصراحة يا أبو عبداللة معندناش صراحــــــــــــــــــــــة
والكل بيعمل زى أحمد أخوك مع الاعتذار لأبو أحمد
ومشكور على طرحك للموضوع
وجا فى الوقت المناسب

موضوع جميل ورائع وفيه فكر واعى بارك الله فيك

رد مختصر

مشكور الاخ صالح ابوكريم صاحب القلم المميز الجرئ
بارك الله فيك على مرورك وعلى كلماتك المفيدة

الاخ الامبراطور شكرا جزيلا على مرورك الكريم

» هو انت حتنتخب مين للرئاسة ؟؟؟ هو انت مع اى حزب ؟؟؟ هو انت ليك فى السياسة اصلا ولا فاضى وخلاص ؟؟؟ حد يرد عليا ....