ثورة وطن

[img]

[/img]

بات الوطن حيران .
من ثورة الجدعان .
يفرح بيهم والا ..
يبكى عليهم والا ..
ياخدهم بالأحضان .
******
قام الشعب بثورته .
حلف لا يقول كلمته .
قام من سُباته وغفلته .
صرخ وعليت صرخته .
أنا عايز حقى وأعيش إنسان .
******
غلطان يا اللى انت تفكر .
ابن بلدى ضعيف ومُجبر .
هو صحيح ع المر بيصبر .
بس فـ وقت الظلم ما يكتر .
بيرفع راية العصيان .
******
خرج الشعب بكل فئاته .
كل ولاده .. وكل بناته .
علَّى فـ صوته وعلّى آهاته .
قدم روحه.. وكل حياته .
فدا ضى عيون الأوطان .
******
حلف الشعب ما يوم يتنازل .
ويطاطى ويخضع ويحايل .
وقال يا خواجة كفاية جمايل .
ولحد ما يوصل ح يناضل .
لو يدفع عمره كمان .
*******
ثار الشعب بكل ولاده .
شايل كل تاريخ أجداده .
والكون شاهد على أمجاده .
مصرى وعاشق أرض بلاده .
ولا يوم يقبل بالطغيان .
******
علَّى شبابنا الصوت ولا همه .
صمم إنه يحقق حلمه .
لمصر الغالية حبيبته وأمه .
حبها عايش جوه فـ دمه .
مصر حياة وضمير وكيان .
*******
من أسوان لاسكندرية .
خرج الشعب وقال سلمية .
واللى يخرب بلدى الغالية .
مش منى ودسيسة عليَّه .
كان رافع راية الحرية .
بيعليها فـ كل مكان .
******
قال هكون سيد قرارى .
مش هتراجع عن مشوارى .
أنا هرسم بإيدى مسارى .
بعد ما عشت العمر بدارى .
عن بلدى دموع الحرمان .
*******
آدى الشعب الغالى الحر .
بعد ما خلص كل الصبر .
بعد ما قاسى ذل وغدر .
قال مش ناوى يقضى العمر .
مستنى الفجر اما يبان .
*******
قال بعلو الصوت أنا مصرى .
واللى يحاول يسرق نصرى .
يسقفلى وسكينته فـ ضهرى .
ويزايد على حلمى وعمرى .
هكشف لعبه فى كل مكان .
*******