مين فينا اللى حمار

يابن ادم يا كبير الدار قلبت علي اللى قالك يا حمار
هو اسمى شتيمة ولا جنسى هو العار
خلقنى ربى وخلقلك وماحدش منا اختار
انا مهما زاد الحمل عليا صابر على المشوار
لا فى يوم اقول اشمعنى اخويا وواخد منه تار
ولا يوم ابص لرزق غيرى واطق منه واغار
ولا ارفع عينى على جارتى ولا اى جار
ولا مهر ادفع لحمارتى ولا شبكة ولا سوار
ولا شقة اجمع تمنها ولا حتى اجهز دار
ولا مرتى حامل وتتوحملى على كافيار
ولا بنتى تخرج عن طوعى وتجيب لابوها العار
ولا ابن يدمن ويهلوس ويقع فى الاخر وينهار
باكل وباشرب وبنهق وما فبش عندى اسرار
وابن ادم عندى يخدمنى ليل وطول النهار
وان جعت يشترى برسيمى باغلى الاسعار
وفى مرضى يفضل يعالجنى ويدعى يا ستار
خادم امين من غير راتب ولا حتى ايجار
عرفت بقى يابن ادم مين فينا اللى حمار