بحبك يا مصر

بَحِبِّكْ يامصرْ

بَحِبِّكْ يا مصرْ ..

وبعشقْ ترابكْ .

وألِفْ المداينْ ..

وأرْجعْ لبابِكْ .

وأحِسْ بكيانى ..

وكرامتى فْ رحابِكْ .

يقولوا فقيره ..

يقولوا أسيره ..

بشوفِكْ أميره ..

وأحبِّكْ يا مصرْ .

بحبِّكْ ملايه .. ومنديلْ بِقُويا .

مقالبْ من أختى .. وغتَاته مْنْ أخويا .

ودعوه مِنْ أمى .. تنسينى همِّى ..

وحِكْمَه مْنْ أبويا.

وأحبِّكْ صبيِّه .. على البحرْ جايَّه ..

فى ساعةْ عصَارى .

ونسمه قُبَالْها .. تطيَّرْ فى شالْها ..

تبَيِّنْ جمالها .. وتِرجعْ تدارى .

وأحبِّكْ مراكبْ .. تعدِّى إللِّى راكبْ ..

لبرْ الأمانْ .

يدوبْ جوَّا نيلكْ .. ويعطشْ يجيلكْ ..

يقوللِّكْ كمانْ .

وأقابلِكْ ببُوسه .. فى زفِّةْ عروسه ..

ولَمَّه فى بيتنا ..

مع ولادْ حارتْنا ..

تدُقْ المزاهرْ .. ترُدْ المزامرْ ..

تزَغْردْ جارتْنا .

نهلِّلْ .. نغنى ..

وحلمْ التمنِّى ..

ينورْ ليليتنا .

وأحبِّك زياره لبيتْ عمْ سيدْ ..

ده أصله فقير مِشْ حيقْدرْ يعَيِّدْ ..

نعَيِّدْ عليه .. نفرَّحْ عنِيهْ ..

ويدعيلْنا دعوه بمليونْ جنيه .

فى أرضِكْ يحِسْ الغريبْ إنُّه مصرى ..

وإحنا الأجانبْ .

ويلْقَى الرعايهْ .. ويلْقَى الحمايهْ ..

على كلْ جانبْ .

ويمشى ف ربوعِكْ .. ويشبعْ بجوعِكْ ..

ويعملْ مصايبْ .

ويرحلْ وينسى .. جِميلِكْ ويقْسَى ..

ويطْلَعْ يعايبْ .

ويرْجعْ تسامْحى .. يا ساكنه فْ ملامحى ..

يا سِتْ الحبايبْ .

ولادِكْ بَنُوكى .. بروحْهُمْ فَدُوكى ..

ويِشْهدْ عليهمْ ترابكْ فى سينا .

ومنهُمْ با عوكى .. عشانْ الشِيروكِى ..

وفيللَّا فْ مارينا .

يعيشوا فى خيرِكْ .. ويدُّوهْ لغيركْ ..

ولادْ اللَّذِينا .

ولوْ جارْ زمانْهمْ .. يعودُوا لْمكانهمْ ..

يلاقوا السَكينَهْ .

وتِنْسِى جحودْهمْ .. وتبكى عليهمْ ..

عنيكى الحزينهْ .

فى أرضكْ سرَحْتْ .. فشَلْتْ ونَجَحْتْ ..

وعشْتْ بْبساطَهْ .

صاحِبتْ الحمَامْ .. ونِمْتْ فْ سلامْ ..

ولوَْ عَ البلاطهْ .

تِغَيَّرْ فى شَكلى ..همومى ومشَاكْلى ..

لكِنْ روحى لأْ .

أعَبَّرْ بغنْوهْ .. وأقولْ نُكتهْ حلوهْ ..

لكِنْ يأسْ لأْ .

ما طيقْشْ الغَتاتهْ ..

وقلبى المسالمْ ما يعرفْ شّماتهْ ..

وأقولْ بالتلاتهْ

بحبك يا مصر F35gd

اهداء من / شادلى عادل الدكتور

ماشاء الله عليك يا احمد شوقي
قصدي يا شاذلي
هههههههههههههه
وننتظر منك كل جديد يا دكتور
بحبك يا مصر 939200

مشاء الله عليك

ياريس دايما متالق بالموضوعات

وانا واثق من أن الشعر من داخلك أخى الفاضل

نرجو المزيد والمتابعه

نشكر السيد رئس المنتدى السيد الاخ الفاضل ابن الفاضل السيد محمد عبدالله على التعديل ربنا يزيدك

لردك الطيب

وأن كان شكرا فليكن الى أخونا الاستاذ المحاسب / محمد عيد

الذى ساهم معنا يوما بيوم لرقى المنتدى

وتطويره ومازلينا فى التطوير

ونستقبل جميع الاقترح من جميع الأعضاء

كما اشكر الاستاذ المدير / حسام صالح على مجهوداته

ممكن اسال الاستاذ/شازلى
هى مصر عملت لينا اية علشان نحبها
وليك انت بالاخص بحبك يا مصر 121552

مشكووورررين وتحيا مصر